₱2.285M nga student allowance giapod-apod sa 914 ka Dinagatnon nga estudyante sa SNSU

SURIGAO CITY: Personal nga mibisita si Dinagat Islands Governor Nilo P. Demerey, Jr. sa main campus sa Surigao del Norte State University o SNSU niadtong Agosto 25, 2026, aron mangulo sa pagpanghatag og educational allowance ngadto sa mga estudyante gikan sa ilang probinsya.

Mikabat sa 914 ka mga benepisyaryo ang nakadawat og tag-₱2,500 nga hinabang, diin adunay kinatibuk-ang kantidad nga ₱2,285,000.00 ang gipagawas sa Provincial Government of Dinagat Islands.

Ang maong programa kabahin sa padayon nga suporta sa lokal nga panggamhanan sa mga kabatan-onan nga nagpadayon sa ilang pag-eskwela gawas sa ilang probinsya. Personal usab nga nakigkita ang gobernador sa mga benepisyaryo atol sa distribusyon aron ipadayag ang padayon nga pagtagad sa iyang administrasyon sa edukasyon ug sa kaayohan sa mga kabataan.

Kauban sa gobernador sa malampusong distribusyon ang Provincial Treasurer’s Office nga gipangulohan ni Provincial Treasurer Maria Jocelyn S. Albores ug ang Dinagat Islands Police Provincial Office, kinsa nagtinabangay aron masiguro ang hapsay nga pagpahigayon sa maong kalihokan. Alang sa dugang impormasyon sa mga programa sa edukasyon sa lalawigan, mahimong bisitahan ang opisyal nga pahina sa Dinagat Islands – PIO