SAN JOSE, DINAGAT ISLANDS: Gipahigayon sa Provincial Guest Center sa Lungsod sa San Jose ang 1st Philippine Downstream Oil Industry and LGU Summit 2026 Batch 2 niadtong Agosto 11, 2026, diin gitigom ang mga representante gikan sa mga lokal nga kagamhanan, nasyunal nga ahensya, ug mga stakeholder sa industriya sa lana.
Mitambong sa maong kalihokan si Provincial Governor Nilo P. Demerey Jr. aron ipahayag ang iyang suporta sa maong panagkatigom nga gipahigayon uban sa pakigtambayayong sa Department of the Interior and Local Government o DILG, Department of Energy o DOE, Department of Science and Technology o DOST, sanan Department of Budget and Management o DBM.
Sa iyang mensahe, gipasiugda ni Governor Demerey ang kamahinungdanon sa lig-on nga panag-uban sa lokal nga panggamhanan ug sa industriya aron mapatuman ang maayong pagdumala, responsableng pagpalambo sa negosyo sa lana, ug pagkab-ot sa mas malungtarong kaugmaon sa tibuok lalawigan sa Dinagat Islands.