43-anyos nga lalaki, patay sa pagpanunggab sa Surigao City

SURIGAO CITY: Patay ang usa ka 43-anyos nga lalaki human kini dunggaba sa usa ka 24-anyos nga lalaki atol sa panaglalis sa Purok 5, Malipayon, Espina Street, Barangay Taft, Surigao City niadtong alas-7:30 sa buntag, Agosto 20, 2026.

Giila sa kapulisan ang biktima nga si Jayson Corbeta Dela Cruz, 43 anyos, samtang ang suspek mao si John Iverson Duero Lito, 24 anyos, diin pareho silang residente sa maong dapit. Base sa imbestigasyon, misulay pagpasakay sa iyang motorsiklo ang biktima dihang nakasugat niya ang suspek, nga misangpot sa panaglalis ug pisikal nga komprontasyon diin gidunggab ang biktima. Gidala pa ang biktima sa Caraga Regional Hospital sa Surigao City Rescue Team apan gideklarar nga dead on arrival alas-8:25 sa buntag.

Nasikop dayon sa mga nagrespondeng PNP patrollers ang suspek kinsa kasamtangang anaa sa kustodiya sa kapulisan samtang gikatakdang pasakaan og tukmang kaso, samtang personal nga pagdumot o kasuko ang gitan-aw nga posibleng motibo sa maong insidente.