SURIGAO CITY: Madasigon ug puno sa pagkamalikhain nga gisugdan karong adlawa, Setyembre 9, 2026, ang “4th Bonok-Bonok Art Tournaments” nga gipahigayon sa CityMall Surigao sa Barangay Luna, diin nagtipon ang nagkalain-laing lokal nga visual artists ug mga batan-ong Surigaonon.
Ang maong kompetisyon nga gi-organisar sa Guhit Pinas-Surigao—isip kabahin sa selebrasyon sa 42nd Bonok-Bonok Maradjaw Karadjaw Festival ug sa ika-232nd San Nicolas de Tolentino Town Fiesta—naglakip sa mga kategoriya sa Painting, Charcoal Rendering, ug Poster Making. Nagpakita ang mga partisipante sa ilang nagkalain-laing kahanas ug malikhaong konsepto, diin dungan usab nga gipahigayon ang Kids Art Workshop alang sa mga kabataan sa hapon.
Giawhag sa mga organizers ug sa pamunuan sa siyudad ang publiko, pamilya, ug mga mahiligon sa sining nga moanha sa CityMall aron makit-an ug masuportahan ang talagsaong talento ug mga obra sa mga homegrown visual artists sa Surigao. Ang awarding ug opisyal nga pagtapos sa maong art festival gikatakda sa Biyernes, Setyembre 11.
Leave a Reply