COTABATO CITY: Gibutyag ni Mohagher Iqbal, ang pangulo sa Peace Implementing Panel sa Moro Islamic Liberation Front o MILF, nga ang panaw sa proseso sa kalinaw sa Bangsamoro magpadayon gihapon bisan unsa pa ang mahimong resulta sa umaabot nga 1st Bangsamoro Parliamentary Elections karong Septyembre 14, 2026.
Sumala kang Iqbal, ang nasangpit nga eleksyon sanan ang pagtapos sa transisyon karong Oktubre 30 kabahin sa mas dako nga proseso sa kalinaw tali sa kagamhanan sanan sa MILF. Gipaabot nga magtagbo ang Peace Implementing Panels sa GPH sanan MILF sa Kuala Lumpur karong Septyembre 25 diin naproklamar na ang mga mudaug sa maong eleksyon aron mag-andam sa paglingkod sa katungdanan.
Nagpabilin ang paglaom ni Iqbal nga makakuha og saktong gidaghanon sa mga lingkoranan ang United Bangsamoro Justice Party o UBJP sa 80-ka-miyembro nga Parliyamento sa Bangsamoro. Gipasabot niya nga ang kadaugan sa ilang partido mahimong usa usab ka kadaugan sa kalinaw tungod kay mas hapsay ang dagan sa pagpatuman sa mga programa kon ang gobyerno mismo gikan sa mga nagpaluyo sa kasabutan.
Kahinumdoman nga si MILF chair sanan UBJP President Ahod “Al Haj Murad” Ebrahim ang nag-unang nominado sa partido, samtang si Iqbal ang ikaduha niini.