SURIGAO CITY: Mokabat sa kapin 8.5 milyones pesos ang kinatibuk-ang danyos sa kabtangan human ang nahitabong sunog sa Purok Zenia, Nueva Extension, Barangay Taft, Surigao City.
Sumala sa report, miabot sa 5,706.52 square meters ang gilapdon sa area nga naapektuhan sa maong sunog. Base sa assessment sa City Social Welfare and Development Office o CSWDO, anaa sa 110 ka pamilya o 525 ka indibidwal ang nawad-an sa ilang mga pinuy-anan, lakip na ang 51 ka boarders, duha ka pamilya nga mga renter, ug usa ka family sharer.
Gipahayag sa Surigao City Central Fire Station nga miabot sa fourth alarm ang maong sunog ug gideklarar nga fire out mga alas 5:42 sa hapon human sa kapin lima ka oras nga operasyon sa mga bombero ug uban pang responders. Walay natala nga fatality sa maong insidente, apan usa ka 24 anyos nga lalaki nga si Michael Paymalan ang nakaangkon og samad.
Gipahinumduman ni FSINSP Quinto ang tanang Surigaonon nga magmatngon kanunay ug sundon ang mga safety measures aron malikayan ang susamang insidente. Sa pagkakaron, nagpadayon ang assessment sa CSWDO aron mahibaloan ang panginahanglan sa mga biktima ug mahatagan sila og angay nga ayuda.