BAN Toxics, naghangyo og review ug mas hugot nga pagpatuman sa Ecological Solid Waste Management Act

PARANAQUE CITY: Nanawagan ang environmental group nga BAN Toxics alang sa usa ka sakto nga pagrepaso ug mas hugot nga pagpatuman sa Republic Act 9003 o ang Ecological Solid Waste Management Act, human naanod ang daghang basura gikan sa Manila Bay ngadto sa mga agianan sa tubig sa Parañaque City.

Gipahayag ni Thony Dizon, advocacy ug campaign officer sa BAN Toxics, nga ang patrasikong paglabay sa basura, kakulang sa pasilidad, ug ubos nga kamalayan sa publiko maoy nagpakita sa dinalian nga panginahanglan sa mas isog nga pagpatuman sa balaod. Sumala sa datos gikan sa Compendium of Philippine Environmental Statistics, adunay ra kapin sa 20,458 ka materials recovery facilities o MRF ang nasud bisan pa nga lapas sa 42,000 ang ihap sa mga barangay sa tibuok Pilipinas.

Gawas sa pagpauswag sa edukasyon ug infrastructure sa mga lokal nga kagamhanan o LGUs, gihangyo usab sa BAN Toxics ang opisyal nga pag-ila ug pag-apil sa mga informal waste workers sa mga sistema sa pagdumala sa basura, pinaagi sa paghatag kanila og mga social ug health benefits, sakto nga kagamitan, ug luwas nga kahimtang sa pagtrabaho.