LGU Claver, pormal nang nagpahigayon sa blessing ug turnover sa bag-ong Municipal Slaughterhouse

CLAVER, SURIGAO DEL NORTE: Gipahigayon karong adlawa ang opisyal nga Blessing and Turnover Ceremony sa bag-ong nahuman nga Claver Municipal Slaughterhouse nga nahimutang sa Sitio Pangi, Barangay Ladgaron, Claver, Surigao del Norte.

Gipangunahan ang maong mahinungdanong kalihokan ni Municipal Mayor Hon. Georgia D. Gokiangkee, kauban ang mga miyembro sa Sangguniang Bayan nga sila Hon. Ernesto P. Sulapas, Hon. Marie Jane C. Jatulan, ug SK Federated President Hon. Mary Ann E. Sarmiento. Ang maong pasilidad usa ka importanteng proyekto sa lokal nga pangagamhanan nga nagtumong sa paghatag og himsog, limpyo, ug luwas nga kahimtang sa pagproseso sa karne subay sa estrikto nga sumbanan sa food safety ug sanitation.

Gilauman nga pinaagi sa maong proyekto, mas mapalambo pa ang serbisyo alang sa mga meat vendors, livestock raisers, ug sa tibuok komunidad sa Claver aron maseguro ang kalidad ug kahimsog sa mga produkto nga gidalit sa publiko.