SURIGAO CITY: Hugot nga nagpasidaan ang Surigao Metropolitan Water District o SMWD ngadto sa publiko nga ang kinsa mang masakpan nga maghilabot sa linya sa tubig mahimong mag-atubang og kaso ug mapriso subay sa Section 11 sa Republic Act 8041 o ang Anti-Water Theft Act. Ubos niining maong balaod, adunay gahom ang SMWD nga putlon ang serbisyo sa tubig lima ka adlaw human mapadala ang usa ka written notice, ug dili na kini magkinahanglan pa og dugang kumpirmasyon gikan sa korte o bisan unsang administrative order.
Giklaro sa pamunuan sa ahensya ang mga bug-at nga silot alang sa mga malapason. Ang kinsa mang mapamatud-an nga sad-an sa pagpangawat o pagdaot sa pasilidad sa tubig, mahimong mapriso gikan sa unom ka bulan hangtod duha ka tuig, ug pabayron og multa nga doble sa kantidad sa tubig nga gikawat o sa nadaot nga propyedad. Kon ang maong krimen gikalambigitan mismo sa usa ka empleyado, opisyal, o plumber sa water district, mas bug-at nga silot nga pagkapriso gikan duha hangtod unom ka tuig ang ipahamtang kanila. Samtang kadtong mangawat og tubig aron ibaligya o himuong negosyo ang mag-atubang og unom hangtod 12 ka tuig nga pagkapriso.
Gitumbok ni Ensomo nga gawas sa padayon nga epekto sa huwaw ug kakuwang sa ulan, ang illegal nga pag-tamper ug pagputol sa mga linya sa pipila ka mapangahason nga indibidwal maoy usa sa mga nag-unang hinungdan sa pagkawala sa agas sa ubang mga lugar. Busa, hugot nga nag-awhag ang SMWD sa kooperasyon sa tanang Surigaonon nga magdaginot sa paggamit sa tubig ug i-report dayon sa ilang buhatan ang bisan unsang porma sa illegal nga pagpang-tap aron masiguro ang patas nga pag-apod-apod sa suplay taliwala niining nasinati nga krisis.
Leave a Reply