DINAGAT ISLANDS: Usa ka dako nga grassfire ang miulbo sa kabukiran ug kakahoyan sa Manoligao, Dinagat Islands, diin Paspas nga napalong kini pinaagi sa gipahigayon nga joint emergency response effort sa nagkadaiyang mga ahensya sa gobyerno ug komunidad.
Nangulo sa maong aksyon ang personnel sa Bureau of Fire Protection (BFP), mga opisyal sa Barangay Cuarenta, ug mga lokal nga residente. Mitabang usab sa front lines ang mga reservist gikan sa 1505th Ready Reserve Infantry Battalion (1505RBIBn) ubos sa pamunoan ni LTC Nilo P. Demerey Jr., kauban ang Civil Security Unit (CSU), Remedy Action Center (RAC), ug ang Provincial Disaster Risk Reduction and Management Office (PDRRMO) team nga gipangulohan ni Forester Dennis Banacia. Bahandianon ug lisud nga kabukiran ang gisulod sa mga responder aron masanta ang pagkatap sa kalayo padulong sa mga duol nga kabalayan.
Base sa gipahigayon nga post-incident assessment, dako ang nahimong kadaot sa maong sunog nga dili lang sa mga kakahoyan kondili lakip na sa critical watershed areas, habitat sa wildlife, ug mga pangunang tubigan sa probinsya. Nagpasidaan ang mga awtoridad nga kining kadaot sa watershed maghatag og dugang nga hagit sa nagpadayon nga krisis ug kakulang sa suplay sa tubig sa tibuok isla.
Tungod niini, hugot nga nagpahimangno ang BFP batok sa illegal burning ug kaingin, samtang nagpahinumdom nga ang makasala mag-atubang og bug-at nga silot ug kasong kriminal ubos sa Presidential Decree No. 1613, Revised Penal Code, ug Republic Act No. 9514 (Fire Code of the Philippines). Padayon pa nga gina-monitor ang lugar karong panahona tungod sa kusog nga hangin nga pwedeng makapa-ulbo pag-usab sa kalayo.
Leave a Reply