Cagniog–Luna Access Road mahimo nang maagian sa mga magGAGAMIT og sakyanan, sumala sa SCTMO

SURIGAO CITY: Gipahibalo sa Surigao City Traffic Management Office o SCTMO nga pwede nang maagian ang Cagniog–Luna Access Road, nga nahimutang gikan sa Memorial Park laktod sa likod nga bahin sa Integrated Bus and Jeepney Terminal. Bisan pa nga nagpadayon pa ang pagtapos sa gamay nga bahin sa maong kalsada, gitugutan na kining gamiton sa mga motorista nga gustong muadto sa Barangay Luna aron mapagaan ang dagan sa trapiko.

Bisan kon abli na kini, nagpagawas ang ahensya og mahinungdanong pahinumdom alang sa tanan. Ang mga light vehicles o gagmay nga sakyanan lamang ang gitugutan nga moagi sa maong karsada. Gipasidan-an usab ang mga motorista nga medyo sakahon ang dalan, busa kinahanglan siguruhon nga kaya sa makina sa ilang sakyanan ang pagsaka. Dugang pa niini, hugot nga gibawal ang pag-agi sa mga traditional tricycle sa maong access road.

Nanawagan ang SCTMO sa publiko nga mag-amping, magmatngon, ug tumanon ang mga traffic rules and regulations samtang nagbiyahe. Gipasalamatan usab nila ang kooperasyon ug pagsabot sa tanan samtang ginapaayo ang imprastraktura sa dakbayan, uban sa mithi nga “Keeping our City Streets Smooth, Comfortable and Safe: A vision for a Thriving Surigao.”