BUTUAN CITY: Gihugtan sa lokal nga panggamhanan sa San Miguel ang ilang kampanya batok sa African swine fever o ASF pinaagi sa pagpagawas sa Executive Order No. 077 niadtong Lunes aron ipatuman ang mas estrikto nga mga lakang ubos sa Ordinance No. 22-2021 ug magbutang og mga checkpoint sa mga barangay isip biosecurity ug sanitation facilities.
Matod ni Mayor Michael Corilla, gihimo ang maong tikang human gikumpirma sa Municipal Agriculture Office ug Provincial Veterinary Office ang pagbuto sa ASF sa lungsod, nga nagkinahanglan dayon sa pagpalig-on sa mga lakang sa pagpugong ug pagkontrol. Gikumpirma usab ni Dr. Ashley Mae Abaday-Nono, ang ASF coordinator sa Department of Agriculture sa Caraga o DA-13, nga positibo sa ASF ang upat ka mga barangay sa San Miguel nga naglakip sa Patong, Libas Sud, Tina, ug Poblacion.
Nasayran nga aduna na usab mga kaso nga narekord sukad pa niadtong Hulyo sa Tago ug Tandag City, samtang padayon gihapon ang pag-monitor sa DA-13 sa mga gisuspetsahang kaso sa Cortes. Gikatakda usab nga ipahigayon ang culling operations sa mga apektadong barangay, diin adunay ihatag nga bayad o kompensasyon sa mga apektadong mag-uuma ubos sa DA Executive Order No. 4, series of 2025.
Leave a Reply