DAVAO CITY: Opisyal nga gilunsad sa Davao Tourism Association o DATA, sa pakigtambayayong sa mga Japanese tech developers, ang Digital Davao Tourist Passport mobile application karong Huwebes, Agosto 13, 2026, sa SM City Davao Annex.
Una nga gipagawas sa pormang libro niadtong Nobyembre 2025, ang maong inisyatibo gi-upgrade ug gihimong mobile application ubos sa Smart City supported by Japan ASEAN Mutual Partnership o Smart JAMP. Ang maong software gihimo sa Japanese tech firm nga Scheme Verge gamit ang ilang Horai platform. Gipahayag ni Tatsuki Yamanami, ang CEO sa Scheme Verge, nga ang pagbalhin sa digital nga plataporma naghatag og mas barato ug mas episyente nga solusyon alang sa mga lokal nga negosyo sa dakbayan.
Sa kasamtangan, adunay 47 ka mga lokal nga establisemento ang nakatala sa maong application, ug gilauman nga madagdagan pa inin sa dili pa matapos ang tuig. Sa mga sunod nga update, madugangan usab ang app og AI powered itinerary builder nga awtomatikong mag-organisa ug magpaayo sa mga rota sa pagbiyahe sa mga turista sa Davao City. Libre nga ma-download ang maong app sa Google Play Store alang sa Android ug App Store alang sa iOS, samtang magpabilin gihapon nga magagamit ang physical passport book dungan sa digital nga bersyon.