DND, gipahayag nga makapalig-on sa kahandaan sa AFP ang mga kasabutan sa Canada ug New Zealand

MANILA: Gipahayag sa Department of National Defense o DND nga ang pagpasa sa mga Status of Visiting Forces Agreements o SOVFA tali sa Pilipinas, Canada, ug New Zealand magpauswag sa interoperability, joint training, ug praktikal nga kooperasyon sa Armed Forces of the Philippines o AFP.

Nahimong pormal ang maong mga kasabutan human nga bug-os nga giaprubahan sa Senado ang Resolutions No. 548 ug 549 nga nagratipikar sa maong mga tratado. Matod sa DND, ang Canada ug New Zealand nagpabilin nga kasaligang kapares sa nasud sa pagpanalipod sa rules-based international order ug sa pag-atubang sa mga hagit sa seguridad sa rehiyon. Gilauman usab nga makatabang ang maong mga kasabutan sa pagpalig-on sa komunidad pinaagi sa humanitarian assistance ug disaster response.

Nasayran nga gipirmahan sa Pilipinas ang SOVFA sa New Zealand niadtong Abril 30, 2025, samtang ang kasabutan sa Canada gipirmahan niadtong Nobyembre 2, 2025, nga mao ang pinakaunang kasabutan sa maong nasud sa tibuok rehiyon sa Indo-Pacific.