MANILA: Nagtagbo ang mga pangulo sa Department of Transportation o DOTr ug sa Department of Tourism o DOT aron tukion ang nagkalain-laing transport-related initiatives nga nagtumong sa pagpauswag sa dagan ug kahapsay sa pagbiyahe paingon sa mga tourist destinations sa tibuok Pilipinas.
Gipangunahan ni Transportation Secretary Giovanni Lopez ug Tourism Secretary Dita Angara-Mathay ang maong panagtagbo niadtong Agosto 5, 2026, isip pagtuman sa direktiba ni Pangulong Ferdinand R. Marcos Jr. nga palig-onon ang koordinasyon sa mga ahensya sa gobyerno aron mapauswag ang koneksyon ug kasayon sa pag-abot sa mga nag-unang destinasyon sa mga lokal ug langyaw nga turista.
Gipresentar ni Secretary Lopez ang mga update sa nagkalain-laing proyekto sa pantalan ug tugpahanan sa nasud, lakip na ang Siargao Airport, Benoni Port sa Mahinog, Camiguin, ug ang Port of Jubang sa Dapa, Siargao Island, Surigao del Norte. Gituki usab ang mga pag-ayo ug pagpalapad sa mga passenger terminal buildings ug runway extensions sa mga regional airports sa Busuanga, Tacloban, Aklan, Tuguegarao, Siargao, Bukidnon, ug Laoag.