Ex-bodyguards ni Zaldy Co nga nagbawi sa ilang pamahayag posibleng mag-atubang og kaso matod sa Ombudsman

MANILA: Ang upat ka kanhi bodyguards ni kanhi Ako Bicol party-list Representative Zaldy Co nga nagbawi o nag-recant sa ilang mga pasangil kabahin sa anomalya sa flood control projects posibleng mag-atubang og mga kasong kriminal, matod pa ni Assistant Ombudsman Mico Clavano niadtong Martes.

Gipasabot ni Clavano nga ang maong mga bodyguards mao ang nag-ingon kaniadto nga nagdala sila og mga maleta nga adunay sulod nga salapi gikan sa kickbacks ngadto sa mga opisyal nga naglakip kang kanhi Speaker ug Leyte Representative Martin Romualdez ug Congressman Co. Apan, giusab nila ang ilang pamahayag ug miingon nga napugos lamang sila sa paghimo sa maong mga pasangil tungod kay gisaaran sila og pinansyal nga seguridad para sa ilang mga pamilya.

Gisaysay usab ni Clavano nga ang panel sa mga imbestigador wala pa makadawat og opisyal nga kopya sa pagbawi sa mga bodyguards, bisan pa nga napasa na kini ngadto sa Ombudsman isip apendise sa counter-affidavit ni Romualdez. Kasamtangang nag-atubang si Romualdez og mga reklamo sa plunder, graft, direct bribery, ug money laundering, giingong kalabot sa isyu sa flood control, diin hugot niyang gihimakak ang maong mga akusasyon ug gipasangil ang Ombudsman nga adunay pagpihig.