SURIGAO CITY: Padayong gipalig-on sa City Government of Surigao ang ilang panag-uban sa Philippine Football Federation o PFF aron palambuon ang paugnat sa kusog o sports, ilabi na ang pag-usbaw sa football sa dakbayan.
Nagtagbo si City Mayor Pablo Yves L. Dumlao II, uban ni City Vice Mayor Alfonso S. Casurra ug mga miyembro sa Sangguniang Panlungsod, sa mga opisyal sa PFF nga gipangunahan ni Atty. Gemayel Gampong, Executive Committee Member sa PFF Mindanao; PFF Executive Committee Member Stephen Gorgonio; ug Surigao del Norte and Dinagat Islands Regional Football Association o SNADIRFA President Romnick Echin. Gituki sa maong panagtigom ang mga pamaagi aron mapalambo pa ang football sa Surigao City.
Usa sa labing dakong kalambuan nga gihisgutan mao ang ₱22 million nga kantidad nga grant gikan sa Philippine Football Federation para sa paghimo sa usa ka full-sized football field didto sa Barangay Sukailang. Dako kini nga mil-lestone sa pagpalig-on sa grassroots sports aron mahatagan ang mga batan-ong atleta og husto ug dekalidad nga pasilidad diin sila makatrabaho sa ilang kahanas ug makapadayon sa ilang damgo.
Dugang pa sa pasilidad, gipaabot nga magbukas kini og mas daghang kahigayonan sa mga Batang Surigaonon aron makaplagan ang ilang talento. Ang panag-uban sa lokal nga panggamhanan ug sa PFF nagpakita sa hiniusang paningkamot sa pag-alima sa mga kabataan ug sa pagtukod og mas mahayag nga kaugmaon pinaagi sa sports.
Leave a Reply