Krisis sa tubig sa Surigao City nagpadajon, mga residente napugos pagpalit og mineral water

SURIGAO CITY: Padajon an pag-antos sa mga residente sa nagkalain-laing lugar sa Surigao City tungod sa grabeng kakulang sa suplay sa tubig, kung diin pipila ka mga barangay an dugay nang walay nasinating regular na agas.

Sumala sa taho sa usa ka residente, gikan pa sa bulan sa Mayo nahutdan na sila og normal na agas sa tubig. Sa pagkakuman, napugos sila sa pagsalig sa ilang mga silingan nga nagpuyo sa mas ubos na bahin aron lamang makakuha og gamay na suplay. Bisan pa niini, gibutyag usab nga kapin duha na ka semana nga nahunong na gajud ang pag-agas sa tubig bisan sa ilang mga silingan. Tungod sa maong kalisod, napugos ang mga pamilya sa pagpalit og mineral water aron gamiton dili lamang sa pag-inom, kondili apil na sa pagluto, paghugas, ug uban pang adlaw-adlaw na panginahanglan sa panimalay.

Samtang, nagpadayon an paningkamot sa Surigao City Water District o SCWD sa pagpangita og solusyon aron madugangan ang suplay sa tubig. Gilauman nga makatabang ang bag-ong gihimong deep well sa Barangay San Juan, apan kinahanglan pa kining butangan og dako na pump ug uban pang kahimanan sa dili pa kini magamit sa hingpit. Padayon usab ang panawagan sa mga hingtungdan sa pagdaginot sa tubig tungod kay miabot na sa kapin 21 ka adlaw ang pag-ubos sa lebel sa tubig sa Parang-parang watershed tungod sa kakulang sa ulan.

Aron mapagaan ang kahimtang, ang Bureau of Fire Protection o BFP mitabang na sa pagpahigayon og rasyon sa tubig. Usa sa mga nakabenepisyo ang mga residente sa Purok 1-A, Barangay San Juan, kinsa nagpahayag sa ilang dakong pasalamat human mahatdan og kinahanglanon na tubig.