Palawan Group, nag-reyna og sunod-sunod nga mga pasidungog sa International HR Awards sa Singapore

MANILA: Duha ka prestihiyosong kalibutanong pasidungog sa bahin sa Human Resources ang nakuha sa Palawan Group of Companies sa nagkalain-laing kalihokan nga gipahigayon sa Singapore.

Nailog sa maong kompanya ang Winner of the Human Capital Management o HCM Transformation Award sa SAP Customer Excellence Awards for Southeast Asia 2026 niadtong Agosto 4 didto sa Sands Expo and Convention Centre. Sila lamang ang bugtong organisasyon gikan sa Pilipinas nga nakadawat sa maong pasidungog. Dugang pa niini, giila usab sila niadtong Agosto 3 nga usa sa Asia’s Best Employer Brands 2026 sa World HRD Congress didto sa Pan Pacific Singapore agig paghatag og bili sa ilang maayong estratehiya sa HR, leadership development, ug workforce transformation.

Gipahayag sa Palawan Group nga ang maong mga pasidungog nagpamatuod sa ilang pagtuo nga ang tinuod nga pag-uswag nagsugod sa paghatag og bili sa mga trabahante, aron mas mapalambo pa ang ilang pagdalit og serbisyo sa milyon-milyong Pilipino.