PNP andam sa pagresponde sa bisan unsang emergency panahon sa Charter Day sa Surigao City

SURIGAO CITY: Nagpasalig ang Philippine National Police o PNP nga andam ang kapulisan sa pagresponde sa bisan unsang emergency o dili maayong insidente nga posibleng mahitabo samtang ginasaulog ang Charter Day sa Surigao City. Gibutyag kini ni PLT. COL. Atty. Mariano Lukban atol sa usa ka press conference, diin gihisgutan niya nga aduna silay gikatakdang klaro nga response mechanism aron masiguro ang kaluwasan sa tanan atol sa mga kalihokan.

Gani, gipasiugda ni Lukban nga prayoridad gayod sa kapulisan ang seguridad sa mga lumulupyo, bisita, ug mga partisipante tungod sa gilauman nga pagdagsang sa daghang tawo. Bisan pa man sa dakong hagit sa pagmintinar sa kahusay ug kalinaw sa mga lugar nga nahimutangan sa mga aktibidad, gipasalig sa PNP nga igo na ang ilang kasamtangang pwersa ug wala na kinahanglana nga dugangan pa ang mga personahe aron epektibong atubangon ang bisan unsang sitwasyon.