SAN JOSE, DINAGAT ISLANDS: Mipakita sa ilang mga lokal nga produkto ug katakos sa agrikultura ang Probinsya sa Dinagat Islands ubos sa administrasyon ni Governor Nilo P. Demerey Jr. atol sa gipahigayon nga ASPIRE 2026 Agribusiness Exposition didto sa Robinsons Place Butuan, Butuan City gikan kaniadtong Agosto 6 hangtod Agosto 9, 2026.
Ang maong pakig-uban kay kabahin sa padayon nga paningkamot sa pamunoan sa lalawigan nga palig-unon ang agribusiness promotion, investment, ug market linkage alang sa mga mag-uuma ug mangingisda sa tibuok isla. Pinaagi sa Office of the Provincial Agriculturist o OPAg, pormal nga gipangunahan ni Provincial Agriculturist Rico B. Galinato, kauban sila si Provincial Agribusiness Coordinator Gilbert V. Anguay ug Alternate Ms. Mirazol E. Pilapil, ang pagrepresentar sa lalawigan atol sa ribbon cutting ceremony kauban ang mga opisyal sa rehiyon sa Caraga.
Nagtumong ang ASPIRE 2026 sa pagpalambo sa mga lokal nga produkto, pagdani sa mga bag-ong pamuhunan, ug pagdugtong sa mga mag-uuma, mangingisda, ug MSMEs ngadto sa mas dakong merkado sa rehiyon subay sa padayon nga suporta sa probinsya sa maong sektor.