SURIGAO CITY: Gi-aprobahan sa Sangguniang Panlungsod sa Surigao City ang rekomendasyon sa Joint Committee on Rules ug Committee on Environment and Natural Resources, nga gipangulohan ni Honorable Atty. Noel P. Catre, alang sa planong pagtukod og water reservoir sa Barangay Mabini ug ang pagpatuman sa Bulk Water Supply Project.
Human sa masusing diskusyon ug pagsusi sa mga detalye nga gipresentar atol sa committee hearing, nakita sa Joint Committee nga ang maong proyekto dako og ikatabang sa pagsulbad ug pagpalig-on sa suplay sa tubig sa tibuok dakbayan. Gikonsiderar usab sa mga sakop sa konseho ang dakong kontribusyon sa maong inisyatibo aron makahatag og mas lig-on, kasaligan, ug igo-igo nga suplay sa tubig alang sa tanang residente sa siyudad.
Tungod niini, girekomendar sa Joint Committee ang pag-aproba sa hangyo ug ang pagpasa sa resolusyon nga nagsuporta sa maong mga proyekto. Ang maong lakang kabahin sa padayong paningkamot sa City Government nga matubag ang dugay na nga panginahanglan sa mas maayong serbisyo sa tubig alang sa mga Surigaonon.