SURIGAO CITY: Naghatag og tabang ang kaparian gikan sa Surigao North Deanery sa Iglesia Filipina Independiente o IFI Diocese of Surigao pinaagi sa pag-apod-apod og mga kitchenware sa mga pamilyang nabiktima sa dakong sunog didto sa Barangay Nabago, Surigao City.
Nahitabo ang maong sunog niadtong Domingo, Agosto 9, 2026, kon diin miabot sa 41 ka mga balay ang naugdaw, samtang 49 ka pamilya o 170 ka indibidwal ang naapektuhan. Sumala sa mga taho, nagsugod ang kalayo sa usa ka panimalay sa may dunggoanan sa barangay sa alas 9 sa buntag ug hingpit nga napalong paglabay sa duha ka oras.
Pinaagi sa Social Action Program sa diyosesis ubos sa Committee on Social Concerns and Development nga gipangulohan ni Rev. Ramil Aguilar, natunol ang maong mga galamiton sa kikitchen. Gipasabot ni Rev. Clyde Catuburan sa Balibayon Parish nga gipili nila ang kitchenware tungod kay napun-an ug naatiman na sa ubang ahensya ug sa lokal nga panggamhanan ang pagkaon ug uban pang mga batakang panginahanglanon sa mga biktima.