BAROBO, SURIGAO DEL SUR: Sikop ang tulo ka lalaki nga giila sa mga awtoridad isip mga street-level drug personalities atol sa gilusad nga joint buy-bust operation sa Philippine National Police o PNP ug sa Philippine Drug Enforcement Agency o PDEA didto sa Purok 5, Barangay Causwagan, Barobo, Surigao del Sur niadtong Agosto 27, 2026. Ang operasyon nga gihimo gikan sa alas 3:30 sa hapon hangtod sa alas 5:10 sa hapon miresulta sa pagkakumpiska sa 11 ka pakite sa gidudahang shabu nga adunay gibug-aton nga 12.57 gramos ug gibana-banang nagkantidad og ₱85,476.
Gawas sa ilegal nga droga, nakuha usab sa mga otoridad ang buy-bust money ug uban pang mga paraphernalia gikan sa mga dinakpan nga giila pinaagi lamang sa ilang mga alyas nga sila “Yoyong,” 34 anyos, usa ka motorcycle technician ug residente sa Barangay San Jose, Barobo; “Ray-Ray,” 37 anyos, radiator mechanic gikan sa Upper Doongan, Butuan City; ug “Deden,” 48 anyos, usa ka mag-uuma nga taga Barangay San Vicente, Butuan City. Giingong gilunsad ang maong operasyon ubos sa pagpanguna ni Barobo MPS Chief PMAJ Andrew G. Lupian ug PDEA-Surigao del Sur human makadawat og seryosong impormasyon bahin sa iligal nga kalihokan sa mga suspetsado.
Gipailawom sa saktong imbentaryo ug dokumentasyon ang mga ebidensya atubangan sa usa ka barangay kagawad ug tigpamaba sa media, samtang kasamtangan silang gibutang sa kustodiya sa Barobo MPS samtang nag-atubang sa mga kasong paglapas sa Republic Act No. 9165 o ang Comprehensive Dangerous Drugs Act of 2002. Bisan pa man sa ilang pagkaaresto, padayon silang gipailawom sa husto nga proseso sa balaod ug magpabilin nga inosente hangtod nga mapamatud-an ang ilang kalambigitan sa hukmanan.
Leave a Reply